رسالة إلى أختى

لما بتوحشينى بفتكر أما كنا سوا
كنا نستخبى من وحوش الليل
مرسومين على الحيطان
كنا نسمع قصص وحواديت
وإحنا بنتدفى تحت اللحاف
كنا نسهر نقزقز لب ونشوف الأفلام
ونصلى الفجر جماعة وننام
ونشرب شاى باللبن الصباح
ونسقّى بسكوت العيد
لحد لما يبقى فتافيت ف الكوبيات
ونمشى على الترعة ف المغربية
ونسرق الثمر من الغيطان قبل الأوان

كنا نشارك أحاسيسنا
فى أول الحب وأول كسرة قلب
وأول كتاب قريناه
وأول فسحة فى السر
وأول سفر مش إجبار
وأول وداع

كنا سند لبعض
فى الفشل قبل النجاح
لما كنت أغرق أمد آيدى
أمسك فى طوق نجاة
أمسك فى ميثاق الدم
فى نسيم وآمان
وكنا نشيل بواقى الحاجات
فى صندوق الكراكيب
نحوش فيه باقى الشلينات
نشيل فيه جوابات الصحاب
وأقلام رصاص وأحلام

أختى حبيبتى
زادت وحوش الليل
قامت من ع الحيطان
والفتافيت مبقتش بسكوت
بقيت ذكريات
وأحاسيسنا مبقتش كفاية تمنع فراق
زادت صناديق الكراكيب
وزادت معاها الحاجات
بقى فيها أفكار منسية
وبواقى أحلامنا سوا
وفيها أسرار مستنية اللقاء
وجوابات كتير من غير عنوان
وكام رقم تليفون ليكى مغلق أو غير متاح
وعتاب لسنين اتنسى معاهم كلام
وفيها قصاقيص أخبار
وصور بتواريخ
لأحداث معدش ليها إى عازة
غير إثبات إننا كنا سوا
ف نفس المكان
فى لحظة صفا وراحة بال
قبل لما تبعدنا المسافات

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s