حبر المطار

ارقام كتير على شاشات
نظرات تأهب 
كيلو وزن زايد
يوقفك بالدقايق
بالساعات
وخير زاد السفر
بطاقة الهوية
مكتوبة أو مدارية
والبطاقة العائلية
ف صورة أو معاك 
وقلمك
 لأن دايما السؤال:
حد معاه قلم؟ 
أى حاجة تانية مش مهمة
أى حاجة تانية تروح وتيجى
إلا الأوراق الرسمية
ولحظة الوداع

فى كابينة الجوازات
محتاجين يمضوا
مسموح الخروج
لكن الظابط قلمه ضاع 
اخد الحبر منى
ومع أن الحبر حبرى
والختم من حقى
سأل ميت سؤال
يا حضرة الظابط مش هتفرق
تعددت الأسباب
والسفر واحد
الأرض أرض الله واسعة
غيرش بس شوية الحدود واللغات

وقبل بوابة الإقلاع 
ناس بلبس مدنى
اختارونى 
قالوا عينة عشوائية
فتشونى
وأما إتاكدوا إنى مش خطر
الظابط محتاج يختم
إنى سلمى 
قلمه الحبر خلص 
اخد الحبر منى 
عشان يكتب جنب أسمى
مش إرهابية
جاية وماشية ف سلام

وقبل بوابة الصعود 
طفل بكى
رسمت طيارة على الورق
 الحبر حبرى
والدموع معرفلهاش
اول كلمات هيتعلمها
طيارة، تفتيش، تحية الظباط
واول خطوة هيتعلمها
هيعدى بيها البوابات

وقبل السفر
حبيت اكتب
اسم ابنى جنب أسمى
والعنوان هنا او هناك
لو يتوه أو أتوه
محدش ضامن الأيام
وقبل ما الحق اكتب
اول حروف لاسمه
خلص الحبر منى
قبل ما نبدأ المشوار

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s