إنت منين؟

يا بنتى
لو سألوكى إنت منين
قوليلهم
أنا لوحدى بلد
الفرقة إللى ف شعرى
دى من ستى
وعيت عليها كده
شعرها أحمر زى النار
مرسوم مفروق
ميختلفش كتير عن طبعى
والأبيض إللى فى رموشى
ده من خالتى
خصلة بياض التلج
هتكبر مع الزمن
والفلقة اللى ف سنانى
من اخت جدتى
احنا كده بنمد لسابع جد
وريحة القرفة والقرنفل
طب دى من خبيز امى
والضحكة من بيتنا
والرواق ساعة العصارى
من قعدة البلكونة
واكل الذرة المشوى
والحديت على المصطبة
فى البلد عند جدى
وجذورى
هتعرفها من لونى
لما روى النيل فيا
حط اللوتس فى شريانى
وحط كمان قصص وأغاني
و سقانى مزاجى الحامى
بتغير زى الفصول
زى شجر التوت
وسحبة الكحل
دى من كليوباترا
وحياتى إللى لسه مبدأتهاش
هرسمها بنفسى
وحدوتتها هتعرفها منى
بكلمات عربى
انا بس اللى هكتبها