عن الاندماج

ويبقى السؤال
هل اندمجت ف المجتمع؟
ده يعتمد على نوع الاندماج
ومين إللى بيسأل السؤال
انا عن نفسى اندمجت
بعد توهج الانبهار
وصدمة الثقافات
بقيت بقول هالو
الجو شكله هيمطر انهاردة؟
مع انه هو هو
نفس شكله من يومين
وبشترى الجرايد
وبعرف حبة عادات
وكمان باقرأ خريطة المواصلات
ومع ان الاندماج زاد
وبقى عندى صحاب من زمان
بس الانقباض منتهاش
والنومة مش بعمق
زى نومة بيتنا القديم
بخاف لا يفوتني رنة جرس
أو تليفون من مدرسة العيال
أو يفوتنى البوسطجى
بجواب للمهاجرين الجداد
ومع أن الاندماج زاد
وبقى فيه عِشرة مع الجيران
وعيالى بيلعبوا مع عيالهم
زى ما كنا احنا زمان
بس الوحدة هى هى
اول ما بتتقفل البيبان
ايوا الاندماج زاد
عرفت اسماء الشوارع
والمحطات
وأسأل لما أتوه
وزاد كمان معاه الفيتامينات
يمكن تعوض
نور الشمس
وخفة للدم
وونس الأهل والمناسبات
ايوا زاد الاندماج
بتكلم اللغة
وبقرأ الإرشادات
بس القلق لسه منتهاش
بيفوتنى كلام كتير
صعب أعوض تراث وحكايات
بعد كام سنة
على كام حصة اندماج
وبعمل نفسى بضحك
على الايفهات
ايوا اندمجت ظاهريا
اندماج يليق بالسؤال
وداخليا يليق بى
كإنسان بين بلاد
وبسرعة تتناسب عكسيا
مع فرضية الاندماج

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s